ଆମଭାରତ ( ନୂଆଦିଲ୍ଲୀ ): ଆଜି ଲୋକସଭାରେ ମୋଦି ସରକାର ନିଜର କାର୍ଯ୍ୟକାଳର ଶେଷ ବଜେଟ ଆଗତ କରିଛନ୍ତି । ଆଗାମୀ ନିର୍ବାଚନରେ ଭୋଟରମାନଙ୍କୁ ଆକୃଷ୍ଟ କରିବାକୁ ଏହି ମଧ୍ୟବର୍ତ୍ତିକାଳୀନ ବଜେଟରେ ବିଭିନ୍ନ ପଦକ୍ଷେପ ନିଆଯାଇଛି । ଏଥିରେ କୃଷକମାନଙ୍କ ପାଇଁ ବର୍ଷକୁ ୬ ହଜାର ଟଙ୍କା ପ୍ରଦାନ ଲାଗି ଘୋଷଣା କରାଯାଇଥିବାବେଳେ ଶ୍ରମିକମାନଙ୍କୁ ୬୦ ବର୍ଷ ପରେ ପେନସନ ସୁବିଧା ଦିଆଯାଇଛି । ତେବେ ଆଜିର ସବୁଠାରୁ ବଡ଼ ଘୋଷଣା ହେଲା ଯେ ବ୍ୟକ୍ତିକର ଆୟକର ଛାଡସୀମା ଅଢେଇ ଲକ୍ଷ ଟଙ୍କାରୁ ୫ ଲକ୍ଷ ଟଙ୍କାକୁ ବୃଦ୍ଧି । ଏହା ଦ୍ୱାରା ମଧ୍ୟବିତ୍ତ ବ୍ୟକ୍ତିଙ୍କୁ ଆକୃଷ୍ଟ କରିବାକୁ ସରକାର ଲକ୍ଷ୍ୟ ରଖିଛନ୍ତି । କିନ୍ତୁ ସରକାରଙ୍କ ଏସବୁ ଲୋକ ଲୋଭନୀୟ ଯୋଜନା ଦ୍ୱାରା ସରକାରଙ୍କ ଆୟବ୍ୟୟ ଗୋଳମାଳ ହେବନି ତ?
ବଜେଟରେ ସରକାରଙ୍କ ଆୟବ୍ୟୟ ହିସାବକୁ ଦେଖିଲେ ଜଣାପଡେ ଯେ ପ୍ରତି ଟଙ୍କାଟିଏ ଆୟ ପାଇଁ ସରକାରଙ୍କୁ ପ୍ରାୟ ୧୯ ପଇସା କରଜ କରିବାକୁ ପଡିବ । ସେହିପରି ଏହି ଟଙ୍କାଟିଏ ମଧ୍ୟରୁ ଜିଏସଟି ଟିକସ ବାବଦରେ ସର୍ବାଧିକ ୨୧ ପଇସା ପାଇବେ । ସେହିପରି କର୍ପୋରେଟ ଟିକସ ବାବଦରେ ମଧ୍ୟ ସରକାର ୨୧ ପଇସା ପାଇବେ । ଆୟକର ବାବଦରେ ସରକାର ୧୭ ପଇସା ପାଇବେ । ସେହିପରି ସରକାରଙ୍କ ୧ ଟଙ୍କା ବ୍ୟୟ ମଧ୍ୟରେ ସର୍ବାଧିକ ଭାଗ ରହିଛି ରାଜ୍ୟମାନଙ୍କୁ ଦିଆଯାଉଥିବା ଟିକସଭାଗ । ସୁଧ ପରିଶୋଧ ବାବଦରେ ସରକାର ୧୮ ପଇସା ବ୍ୟୟ କରିବେ । କେନ୍ଦ୍ରୀୟ ଯୋଜନା ଗୁଡ଼ିକ ବାବଦରେ ସରକାର ୧୨ ପଇସା ବ୍ୟୟ କରିବେ ।
