ଆମଭାରତ : ଏୟାର ଷ୍ଟ୍ରାଇକ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କଣ କହିବେ ତା ଉପରେ ରହିଥିଲା ସମଗ୍ର ଦେଶ ଓ ବିଶ୍ବର ନଜର । ତେବେ ରାଜସ୍ଥାନର ଚୁରୁ ଠାରେ ମୋଦି ରଖିଥିଲେ ତାଙ୍କ ଅଭିଭାଷଣ । ସିଧାସଳଖ ଏୟାର ଷ୍ଟ୍ରାଇକ ବାବଦରେ କିଛି କହିନଥିଲେ ମଧ୍ୟ ମୋଦିଙ୍କ ଠାଣି ଏବଂ କହିବା ଶୈଳୀରୁ ବୁଝି ହେଉଥିଲା ପୁଲୱାମା ପ୍ରତିଶୋଧ ବାବଦରେ ।
ମୋଦି ଆଜି ଅଭିଭାଷଣ ଆରମ୍ଭରେ ଭାରତ ମାତା କି ଜୟ ବୋଲି କହିଥିଲେ । ଦେଶ ସବୁ ଠାରୁ ଅଧିକ ଗୁରୁତ୍ବପୂର୍ଣ୍ଣ ବୋଲି ମୋଦି କହିଥିଲେ । ଭାରତ କାହା ଆଗରେ ମୁଣ୍ଡ ନୁଆଁଇବ ନାହିଁ । ଦେଶର ମାଟିର ରାଣ ଖାଇ ମୋଦି ପ୍ରତିଶୃତି ଦେଇଥିଲେ ଯେ, ଦେଶର ସୁରକ୍ଷା ପାଇଁ ସେ ପ୍ରତିବଦ୍ଧ । ମୋଦି ବାରମ୍ବାର ଏହି ଧାଡିକୁ ଭାବପ୍ରବଣ ହୋଇ କହିବା ଦେଖିବାକୁ ମିଳିଥିଲା । ବାୟୁସେନାର ଆକ୍ରମଣ ପରେ ଆଜି ରାଜସ୍ଥାନରେ ନିର୍ବାଚନୀ ଭାଷଣ ଦେବା ଅବସରରେ ମୋଦି ରଖିଛନ୍ତି ପ୍ରତିକ୍ରିୟା ।
ପୁଲଓ୍ବାମା ଘଟଣା ପରେ ଭାରତ ଆକ୍ସନ ମୋଡ଼କୁ ଆସିପାରେ ବୋଲି ସାରା ବିଶ୍ଵ ଆକଳନ କରୁଥିଲା । ଏହି ଘଟଣାକୁ ନେଇ ଜାତିସଂଘର ଆର୍ନ୍ତଜାତିକ ସୁରକ୍ଷା ପରିଷଦରେ ମଧ୍ୟ ବସିଥିଲା ବୈଠକ । ପାକିସ୍ତାନ ଓ ଏହାର ଆତଙ୍କୀ କାର୍ଯ୍ୟକଳାପକୁ ନିନ୍ଦା କରାଯିବା ସହିତ କଡ଼ା ଚେତାବନୀ ମଧ୍ୟ ଦିଆଯାଇଥିଲା । ପାକିସ୍ତାନ ଆତଙ୍କବାଦ ସହିତ ସଂପୃକ୍ତ ଥିବା ପ୍ରମାଣ ଖୋଜିବା ସହ ଧମକ ମଧ୍ୟ ଦେଇଥିଲା ।
ପୁଲୱାମା ଘଟଣାର ପ୍ରତିଶୋଧ ଭାବେ ମଙ୍ଗଳବାର ଭୋର ୩.୩୦ରେ ଭାରତ କରିଥିଲା ସର୍ଜିକାଲ ଷ୍ଟ୍ରାଇକ । ୩୦୦ରୁ ଅଧିକ ଆତଙ୍କୀକୁ ମାରିବା ସହ ଆତଙ୍କୀ ଶିବିର ଧ୍ବଂସ କରିଥିଲେ ଭାରତୀୟ ବାୟୁସେନା । ଏହି ଘଟଣାରେ ସାରା ଭାରତ ବର୍ଷ ବିଜୟ ଉତ୍ସବ ପାଳନ କରୁଥିବା ବେଳେ ରାଜସ୍ଥାନ ଚୁରୁରେ ମୋଦି ରଖିଛନ୍ତି ପ୍ରଥମ ଭାଷଣ । ଦେଶପାଇଁ ଶହୀଦ ହୋଇଥିବା ଭାରତୀୟ ସେନାଙ୍କୁ ତାଙ୍କ ବଳିଦାନର ଜବାବ ଏହି ଷ୍ଟ୍ରାଇକ ବୋଲି ମୋଦି କହିଛନ୍ତି । ପାକିସ୍ତାନର ଆତଙ୍କୀ କାର୍ଯ୍ୟକଳାପ ପାଇଁ ଭାରତ କଡ଼ା ଜବାବ ଦେଇଛି, ଭାରତମାତାଙ୍କୁ ଏହା ଉତ୍ସର୍ଗୀକୃତ ବୋଲି ତାଙ୍କ ଅଭିଭାଷଣରେ କହିଛନ୍ତି । ଭାରତ ଶାନ୍ତି ଚାହେଁ ହେଲେ ଭାରତକୁ କେହି ଚ୍ୟାଲେଂଜ କଲେ ତାହାର ଜବାବ ବି ଦେଇପାରେ , ଦେଶ ବର୍ତ୍ତମାନ ସୁରକ୍ଷିତ ଅବସ୍ଥାରେ ଅଛି । ଏହି କଡ଼ା ଜବାବ ଦେବା ପଛରେ ଦେଶର ସମସ୍ତ ଜନସାଧାରଣଙ୍କ ସମର୍ଥନ ରହିଛି ବୋଲି ତାଙ୍କ ଭାଷଣରେ କହିଛନ୍ତି । ମୋଦିଙ୍କ ଆବେଗପୂର୍ଣ୍ଣ ପାକିସ୍ତାନକୁ ଚିନ୍ତାରେ ପକାଇଛି । ମୋଦି କହିଛନ୍ତି ଯେ, ଦେଶର ସୁରକ୍ଷା ଓ ଅସ୍ମିତା ସହ ଯେ କେହି ଟକ୍କର ଦେବ ତାକୁ ଧ୍ବଂସ କରିଦିଆଯିବ । ଏହା ହିଁ ପାକିସ୍ତାନକୁ ଚିନ୍ତାରେ ପକାଇଛି । ଆଗକୁ ଆହୁରି ଭୟଙ୍କର ପରିସ୍ଥିତି ଉପୁଜିବା ଆଶଂକା କରିଛି । ମୋଦିଙ୍କ ଭାଷଣରୁ ଦେଶ ଆଜି ବହୁତ କିଛି ଶୁଣିବାକୁ ଚାହୁଁଥିଲା ଷ୍ଟ୍ରାଇକ ସମ୍ପର୍କରେ । କିନ୍ତୁ ସମ୍ଭବତଃ ସୁରକ୍ଷା କାରଣରୁ ଏବଂ ରଣ କୌଶଳ ଦୃଷ୍ଟିରୁ ମୋଦି ବିଶେଷ କିଛି କହିନଥିଲେ । କେବଳ ଦେଶବାସୀ ଆଜି ଉତ୍ସବ ପାଳୁଥିବାରୁ ସେ ମଧ୍ୟ ଅତ୍ୟନ୍ତ ଖୁସୀ ବୋଲି ପରୋକ୍ଷରେ ଏୟାର ଷ୍ଟ୍ରାଇକର ସଫଳତା ଆଡକୁ ଇଂଗିତ କରିଥିଲେ ।
