ଭୁବନେଶ୍ୱର, ୧୮ା୫( ଆମ ଭାରତ ): କରୋନା ସମ୍ପର୍କିତ ଅପଡ଼େଟ ଦେଇଛନ୍ତି ରାଜ୍ୟ ସରକାର । ଆଜିଠୁ ଲକ ଡାଉନ ୪.୦ ଆରମ୍ଭ ହୋଇଛି । ତାଲାବନ୍ଦ ୪.୦ରେ ସମସ୍ତଙ୍କ ସହଯୋଗ ଲୋଡ଼ିଛନ୍ତି ସରକାର । ଓଡ଼ିଶାରେ ଥିବା ସ୍ଥିତିକୁ ଭଲ ରଖିବା ଆମ ଦାୟିତ୍ୱ ବୋଲି ମୁଖ୍ୟ ଶାସନ ସଚିବ ଅସୀତ ତ୍ରିପାଠୀ କହିଛନ୍ତି । ଏନେଇ ଗାଇଡ଼ ଲାଇନ ଜାରି ହୋଇଛି । କୌଣସି ଘରୋଇ, ଆନ୍ତର୍ଜାତୀୟ ବିମାନ ସେବାକୁ ଅନୁମତି ଦିଆଯିବନି । ଏହାସହ ସ୍କୁଲ,କଲେଜ ଶିକ୍ଷାନୁଷ୍ଠାନ ବନ୍ଦ ରହିବ ସହ ଅନଲାଇନ ଲର୍ଣ୍ଣିଂକୁ ପ୍ରାଧାନ୍ୟ ଦିଆଯିବ । ହୋଟେଲ, ରେଷ୍ଟୁରାଣ୍ଟ ବନ୍ଦ ରହିବ କିନ୍ତୁ ରେଲୱେ, ଏୟାରପୋର୍ଟ କ୍ୟାଣ୍ଟିନ୍ ଚାଲିବ । ସିନେମାହଲ, ଜିମ୍, ଅଡ଼ିଟୋରିୟମ ବନ୍ଦ ରହିବ । ସାମାଜିକ ଉତ୍ସବକୁ ଅନୁମତି ଦିଆଯିବନି । ଲୋକଙ୍କ ପାଇଁ ଧର୍ମାନୁଷ୍ଠାନରେ ପୂଜାର୍ଚ୍ଛନା କରିବାକୁ ମନା ହୋଇଛି । ରାଜ୍ୟ ରାଜ୍ୟ ଭିତରେ ବସ ଚଳାଚଳ ନେଇ ଏପର୍ଯ୍ୟନ୍ତ ନିଷ୍ପତ୍ତି ନିଆଯାଇନାହିଁ । ରେଡ଼, ଅରେଞ୍ଜ ଓ ଗ୍ରୀନ ଜୋନ ନେଇ ସ୍ଥାନୀୟ ଅଧିକାରୀ ନିଷ୍ପତ୍ତି ନେବେ । କିନ୍ତୁ କେନ୍ଦ୍ରର ଗାଇଡ଼ଲାଇନ ଅନୁସାରେ ନିଷ୍ପତ୍ତି ନେବେ । ଅବରୋଧ ଅଞ୍ଚଳରେ କଟକଣା କଡ଼ାକଡ଼ି ଜାରି ରହିବା ସତ୍ତେ୍ୱ ଜରୁରୀ ସେବା ଜାରି ରହିବ । ବାହାରେ ଛେପ ପକାନ୍ତୁ ନାହିଁ ଓ ସାମଜିକ ଦୂରତା ରକ୍ଷା କରନ୍ତୁ ବୋଲି ପରାମର୍ଶ ଦିଆଯାଇଛି । ଅବରୋଧ ଅଞ୍ଚଳ ବ୍ୟତୀତ ଅନ୍ୟ ଅଞ୍ଚଳରେ କିଛି କଟକଣା କୋହଳ କରାଯିବ ।
ଭୁବନେଶ୍ୱରରେ ଆକ୍ଟିଭ୍ ପଜିଟିଭ୍ କେସ ନାହିଁ । ଓଡ଼ିଶାରେ ୧୨୨ଟି କେସ ଆକ୍ରାନ୍ତଙ୍କ ସଂସ୍ପର୍ଶରେ ଆସି ହୋଇଛି । ଅନ୍ୟ ଆକ୍ରାନ୍ତଙ୍କ ସଙ୍ଗରୋଧରେ ରହିଥିଲେ ।
