ଭାପୁର ( ଆମ ଭାରତ ) ୨୯/୯ : ଢେଙ୍କାନାଳ ସଦର ଥାନା ଭାପୁର ମେଡିକାଲ ଛକ ନିକଟ ପରିବା ହାଟରୁ ରବିବାର ପକେଟମାର କରୁଥିବା ୩ଜଣଙ୍କୁ ସ୍ଥାନୀୟ ଲୋକେ ଧରି ପୋଲିସ ଜିମା ଦେଇଛନ୍ତି। ସେମାନଙ୍କ ମଧ୍ୟରେ ଜଣେ ନାବାଳକ ଅଛନ୍ତି। ଯୁବକ ଦ୍ୱୟ ହେଲେ ଅରୁଣ ପ୍ରଧାନ (୧୮), ରବୀନ୍ଦ୍ର ପ୍ରଧାନ (୧୮) ଅଛନ୍ତି। ନାବାଳକଙ୍କ ବୟସ ୧୩ ବର୍ଷ। ସମେସ୍ତ ଯାଜପୁର ରୋଡ୍ ଅଞ୍ଚଳର। ସେମାନେ ଆଠଗଡ଼ ବଜାରରେ ରହୁଥିବା ପଚରାଉଚୁରା ବେଳେ ପୋଲିସକୁ କହିଛନ୍ତି। ହେଲେ ସେମାନଙ୍କ ଉପରେ ସନ୍ଦେହ ସୃଷ୍ଟି ହୋଇଛି। ପୋଲିସ ସତ୍ୟାସତ୍ୟ ଜାଣିବାକୁ ଅଧିକ ତଦନ୍ତ ଜାରି ରଖିଛି।
ପ୍ରତ୍ୟକ୍ଷଦର୍ଶୀଙ୍କ କହିବା କଥା, ସକାଳେ ହାଟ ସ୍ବାଭାବିକ ଚାଲିଥିଲା। ଏହି ସମୟରେ ଦୁଇଜଣ ଗ୍ରାହକଙ୍କ ପକେଟରୁ ଟଙ୍କା ଉଭାନ ହୋଇଯାଇଥିଲା। ଏହି ଘଟଣା ପରେ ସନ୍ଦେହ ଘେରକୁ ଆସିଥିଲେ କେତେଜଣ ସନ୍ଦିଗ୍ଧ। ସେମାନଙ୍କୁ କେତେଜଣ ଯୁବକ ପିଛା କରି କାବୁ କରିଥିଲେ। ଏହାପରେ ଖୁଣ୍ଟରେ ବାନ୍ଧି ନିର୍ଧୂମ ଛେଚି ପୋଲିସକୁ ହସ୍ତାନ୍ତର କରିଥିଲେ। ଅଭିଯୁକ୍ତଙ୍କ ନିକଟରୁ ଚୋରି ହୋଇଥିବା ଟଙ୍କା, ଏଟିଏମ୍ କାର୍ଡ ଜବତ କରାଯାଇଛି। କିଛିଦିନ ହେଲା ନୂଆହାଟ, ଭାପୁର ହାଟରୁ ଚୋରି ବଢ଼ିବାରେ ଲାଗିଥିଲା। ପୋଲିସ ୩ଜଣ ଅଭିଯୁକ୍ତଙ୍କ ଧରିବା ପରେ ଅଞ୍ଚଳବାସୀ ସାମାନ୍ୟ ଆଶ୍ୱସ୍ତ ହୋଇଛନ୍ତି। ଅଭିଯୁକ୍ତଙ୍କୁ ପଚରାଉଚୁରା ପରେ କୋର୍ଟ ଚାଲାଣ କରାଯିବ ବୋଲି ଫାଣ୍ଡି ଅଧିକାରୀ ପ୍ରଶାନ୍ତ ପଢ଼ିହାରୀ ସୂଚନା ଦେଇଛନ୍ତି।
