ଢେଙ୍କାନାଳ ସହରରେ ସକାଳୁ ସକାଳୁ ଏକ ଅଭାବନୀୟ ଘଟଣା ଘଟିଛି । କାନ୍ଥ ଭୁଷୁଡ଼ି ୪ ଜଣ ଲୋକଙ୍କର ମୃତ୍ୟୁ ହୋଇଥିବାବେଳେ ୫ ଜଣ ଗୁରୁତର ଅଛନ୍ତି । ମୃତକମାନେ ହେଲେ ଗେଙ୍ଗୁଟିଆ ଅଂଚଳର ରାମଚନ୍ଦ୍ର ସାହୁ, ଗୁରୁଜଙ୍ଗର ଅଭିମୁନ୍ୟୁ ବିଶ୍ୱାଳ, ଟିନା ବେହେରା ଓ ସଂଗ୍ରାମ ସାହୁ । ସମସ୍ତେ ପରିବା ବେପାରୀ ବୋଲି ଜଣାପଡ଼ିଛି । ସମସ୍ତ ଗୁରୁତରଙ୍କୁ ଢେଙ୍କାନାଳ ମେଡ଼ିକାଲରେ ଭର୍ତ୍ତି କରାଯାଇଛି । ଆହୁରି କିଛି ଲୋକ ସେଠାରେ ଫଶି ରହିଥିବା ଅନୁମାନ କରାଯାଉଛି । ଓଡ୍ରାଫ୍ ଟିମ୍ ଉଦ୍ଧାର କାର୍ଯ୍ୟ ଜାରି ରଖିଛନ୍ତି ।
ମିଳିଥିବା ପ୍ରାଥମିକ ସୂଚନା ମୁତାବକ, ଢେଙ୍କାନାଳ ଟାଉନ ଥାନା ଅନ୍ତର୍ଗତ ଷ୍ଟେସନ୍ ବଜାର ଅଳସୁଆ ହାଟରେ ପ୍ରତ୍ୟେକ ରବିବାର ହାଟ ବସିଥାଏ । ଆଜି ସକାଳୁ ମଧ୍ୟ ବେପାରୀମାନେ ଆସି ହାଟ ଲଗାଇଥିଲେ । ଏହି ସମୟରେ ହାଟରେ ଥିବା ଡି. ହଂସରାଜ ରାଇସ୍ ମିଲ୍ର ଏକ ପରିତ୍ୟକ୍ତ କାନ୍ଥ ହଠାତ ଭୁଷୁଡ଼ି ପଡ଼ିଥିଲା । ଫଳରେ ସେଠାରେ ପରିବା ବିକୁଥିବା ବେପାରୀମାନେ ଚାପି ହୋଇଯାଇଥିଲେ । ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା । ଓଡ୍ରାଫ୍ ଟିମ୍ ୪ ଜଣଙ୍କୁ ମୃତ ଅବସ୍ଥାରେ ଉଦ୍ଧାର କରିଥିବା ବେଳେ ୫ ଜଣଙ୍କୁ ଗୁରୁତର ଅବସ୍ଥାରେ କାନ୍ଥ ତଳୁ ବାହାର କରିଛନ୍ତି । ସେମାନଙ୍କୁ ତୁରନ୍ତ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
କାନ୍ଥ ତଳେ ଆହୁରି ଗାଡ଼ି ଓ ଲୋକ ରହିଥିବା ଅନୁମାନ କରାଯାଉଛି । ଖବର ଲେଖା ଯିବା ବେଳକୁ ଘଟଣା ସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଥିଲା । ଘଟଣା ପରେ ଚାପା ଉତ୍ତେଜନା ଆରମ୍ଭ ହୋଇଯାଇଛି । ଦୀର୍ଘ କୋଡ଼ିଏ ବର୍ଷ ହେବ ସେହି ସ୍ଥାନରେ ହାଟ ବସେ ।
