ଆମଭାରତ ( ବାଲେଶ୍ଵର ) 23/4 : ବିଜେଡି ସରକାର ଯୋଗୁଁ ବାଲେଶ୍ଵର ଜନତା ତଳିତଳାନ୍ତ ହୋଇଛନ୍ତି। ଓଡ଼ିଶାକୁ ଭ୍ରଷ୍ଟାଚାରମୁକ୍ତ କରିବାକୁ ଡବଲ ଇଞ୍ଜିନ ଦରକାର। ବିଜେପିକୁ ୫ବର୍ଷ ସୁଯୋଗ ଦିଅ। ୫ ଗୁଣା ଅଧିକ କାମ କରି ଦେଖାଇବୁ ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ମଙ୍ଗଳବାର ମୋଦୀ ବାଲେଶ୍ଵର ଜିଲାର ବସ୍ତାଠାରେ ଆୟୋଜିତ ବିଜୟ ସଙ୍କଳ୍ପ ସମାବେଶରେ ଯୋଗଦେଇ ଏହା କହିଛନ୍ତି।
ମୋଦୀ ଉଦବୋଧନ ଦେଇ କହିଲେ, ଦେଶ ପ୍ରତି ବାଲେଶ୍ଵରର ବହୁ ଅବଦାନ ରହିଛି। ୩ବର୍ଷ ତଳେ ଆସିଥିଲି। ପରିବର୍ତ୍ତନ ପାଇଁ ବାଲେଶ୍ଵରର ବ୍ୟଗ୍ରତା ଦେଖିଥିଲି। ଓଡ଼ିଶାରେ ପରିବର୍ତ୍ତନ ଆସିବାକୁ ଯାଉଛି। ପ୍ରଥମ ୨ଟି ପର୍ଯ୍ୟାୟ ମତଦାନ ପରେ ଏକଥା ସ୍ପଷ୍ଟ ହୋଇଛି। ସାରା ଓଡ଼ିଶାରେ ଏଥର ପଦ୍ମ ଫୁଟିବାକୁ ଯାଉଛି। ଲୋକତନ୍ତ୍ରର ଶକ୍ତିକୁ ଏଠାକାର ସରକାର ବୁଝିପାରିଲେଣି। ଶାସନତନ୍ତ୍ରକୁ ଜାବୁଡ଼ି ଧରିଥିବା ମୁଖ୍ୟମନ୍ତ୍ରୀ ଏବଂ କିଛି ଅଫିସରଙ୍କ ନିଦ ଉଡିଲାଣି। ଏଠାକାର ଲୋକ ଜାଣିଲେଣି କଛପ ଗତିରେ ବିକାଶ ଚାଲିବନି।
ମୋଦୀ ଆହୁରି କହିଥିଲେ ଯେ, କିଛିଦିନ ତଳେ ବାଲେଶ୍ଵରର ନାଁ ଇତିହାସରେ ଲିପିବଦ୍ଧ ହୋଇଛି। ମିଶନ ଶକ୍ତି ସଫଳତା ବାଲେଶ୍ଵରକୁ ଗୌରବାନ୍ବିତ କରିଛି। ମାତ୍ର ୩ ମିନିଟରେ ଶତ୍ରୁ ପକ୍ଷର ସାଟେଲାଇଟ୍ ଧ୍ଵଂସ କରାଯାଇଛି। ଏପରି ପାରଦର୍ଶିତା ଲାଭ କରିବାରେ ଭାରତ ବିଶ୍ଵର ୪ର୍ଥ ଦେଶ ହୋଇପାରିଛି। ଭାରତ ବର୍ତ୍ତମାନ ଜଳ, ସ୍ଥଳ, ଆକାଷ ଏବଂ ମହାକାଷର ସୁପର ପାୱାର ହୋଇଛି। ଏହି ସଫଳତା ଦେଶବାସୀଙ୍କୁ ଗର୍ବିତ କରିଛି।ସେ କହିଥିଲେ, ବର୍ତ୍ତମାନ କ୍ଷେପଣାସ୍ତ୍ରଠାରୁ ମୋବାଇଲ ପର୍ଯ୍ୟନ୍ତ ସବୁକିଛି ସାଟେଲାଇଟରେ ଚାଲୁଛି।
