ଭୁବନେଶ୍ୱର୍ ( ଆମ ଭାରତ ) ୨୪/୧୨ : ଆସନ୍ତା ଡିସେମ୍ବର ୨୬ ତାରିଖରେ ହେବ ବର୍ଷର ଶେଷ ସୂର୍ଯ୍ୟପରାଗ । ଏହି ଦିନ ପାଇଁ ସରକାରୀ ଛୁଟି ଘୋଷଣା କରାଯାଇଛି । ସୂର୍ଯ୍ୟପରାଗ ଦିନ ରାଜ୍ୟର ସମସ୍ତ ସରକାରୀ ଅଫିସ ବନ୍ଦ ରହିବ । ଛୁଟି ନେଇ ସୂଚନା ଦେଲେ ଗଣଶିକ୍ଷାମନ୍ତ୍ରୀ ସମୀର ରଞ୍ଜନ ଦାସ । ତେବେ ପୌଷମାସ କୃଷ୍ଣପକ୍ଷ ତିଥିରେ ପଡୁଥିବାରୁ ଏହି ସୂର୍ଯ୍ୟପରାଗ ବୃତ୍ତାକାର ହେବ । ଏହା ପୂର୍ଣ୍ଣଗ୍ରାସ ନୁହେଁ, ବରଂ ଖଣ୍ଡଗ୍ରାସ ବା ଆଂଶିକ ସୂର୍ଯ୍ୟପରାଗ ହେବ ।
ଓଡ଼ିଶାବାସୀଙ୍କ ପାଇଁ ସୂର୍ଯ୍ୟପରାଗ ଗୁରୁବାର ସକାଳ ୮ଟା ୨୦ ମିନିଟରେ ଆରମ୍ଭ ହୋଇ ୧୦ଟା ୨୮ ମିନିଟରେ ଶେଷ ହେବ । ଏନେଇ ଡିସେମ୍ବର ୨୫ ବୁଧବାର ସନ୍ଧ୍ୟା ୫ଟା ୩୧ ମିନିଟରୁ ପାକ ନିଷେଦ୍ଧ ହେବ । ଏବର୍ଷର ଶେଷ ସୂର୍ଯ୍ୟପରାଗ ଭାରତ, ସାଉଦିଆରବ, ଇଣ୍ଡୋନେସିଆ, ଶ୍ରୀଲଙ୍କା, ସୁମାତ୍ରା, ମାଲେସିଆ, ଫିଲିପାଇନ୍ସ, ସିଙ୍ଗାପୁର ଏବଂ ଗୁଆମରେ ନଜର ଆସିବ। ଏହା ବ୍ୟତୀତ ଏସିଆ,ଅଷ୍ଟେଲିଆ ଏବଂ ଆଫ୍ରିକାର ଅନ୍ୟ ଅଞ୍ଚଳରେ ଏହା ଆଂଶିକ ଗ୍ରହଣ ଭଳି ଦେଖାଯିବ। । ଏହାପରେ ଆସନ୍ତା ସୂର୍ଯ୍ୟପରାଗ ୨୦୨୦ ଜୁନ୍ ୨୧ ତାରିଖରେ ପଡିବ ।
ତେବେ ସୂର୍ଯ୍ୟପରାଗ ସମୟରେ କୌଣସି ଗର୍ଭବତୀ ମହିଳାଙ୍କୁ ବାହାରକୁ ବାହାରିବା ଅନୁଚିତ୍। ଯେଉଁଠାରେ ସୂର୍ଯ୍ୟପରାଗ ଭଲଭାବେ ନଜର ଆସିଥାଏ ସେଠାରେ ସତର୍କତା ଅବଲମ୍ବନ କରିବାକୁ ପଡ଼ିଥାଏ। ସୂର୍ଯ୍ୟପରାଗ ସମୟରେ ସୂର୍ଯ୍ୟଙ୍କଠୁ ହାନିକାରକ କିରଣ ବାହାରିଥାଏ । ଏନେଇ ସାବଧାନୀ ପରଖିବା ଜରୁରୀ ।
